Sa 6.5 Milyon nga Katapo sang Build, Build, Build Team

Anna Mae Yu Lamentillo
Originally published in Night Owl: A Nationbuilder's Manual (Edisyon sa Hiligaynon)
Ang Build, Build, Build nangin target sang mga fake news, troll, kag kritiko. Gintilawan nila islan ang buot-silingon sini—kag sa ila mabaskog kag butigon nga tingog—ini nangin kamatuoran. Wala ako makahibalo kon sila nagapang duha-duha ukon hungod ang ila pagkatuso.
Madamo ang nagtilaw nga rumpagon ang mga natapos sang 6.5 ka milyon nga mga mamumugon nga Pilipino. Siling nila gamay lang ang aton natapos, nga madamo pa nga mga butang nga nagakadapat naton himuon ukon wala lang gid sang pagpanarabaho sa aton bahin.

Kon nagabasa ka sini kag kabahin ka sang Build, Build, Build Team, ako na mismo ang mahambal sa imo—kon waka ka, wala kita makapahimo sang 29,263 kilometro ka mga karsada, 5,950 ka mga taytay, 11,340 nga mga evacuation centers, 150,149 nga mga eskwelahan, 214 nga mga hulogpa-an, kag 451 ka mga dulongka-an. Sa subong, ang Pilipinas ara sa maayo nga kahimtangan bangud sa inyo kasagad, pagpanarabaho, kag sakripisyo.
Kon indi bangud sa inyo bulig sa pagpatindog sang Pigalo Bridge, ang mga mangunguma sa Isabela nga luyag dal-on ang ila produkto pang-agrikultura sa Manila ukon Tuguegarao, kinahanglan pa nila latason ang 76-kilometro nga Alicia-AngadananSan Guillermo-Naguilian Road. Subong, makalab-ot na ang mga mangunguma sa pareho nga merkado sa sulod lamang sang napulo ka minuto.
Kon indi bangud sa inyo sakripisyo sa pagpahimo sang Central Luzon Link Freeway, ang oras sa pagbiyahe gikan sa Nueva Ecija kag Tarlac 70 minuto pa gihapon. Subong, ang duha ka banwa konektado na sa sulod sang 20 minutos.
Kon indi bangud sa inyo mabaskog nga buot sa pagtapos sang Marawi Transcentral Road, mabudlayan pa sa gihapon sa mga residente sang Marawi nga malab-ot ang mga nagapanguna nga mga serbisyo kag makabakal sang mga produkto. Kamo ang naghatag dalan para sa kasulhayan.
Kon indi bangud sa inyo kasagad, imposible nga mapasad ang Cebu-Cordova Link Bridge. Ang pinakamalaba nga taytay sa Pilipinas. Inyo ginpakita sa mga Pilipino sa bugos nga pungsod nga ang handum nga i-angut ang Luzon, Visayas, kag Mindanao pinaagi sa mga taytay mahimo malab-ot kon kita nagabinuligay.

Kon indi bangud sa inyo pagpaningkamot, indi naton matapos ang pagpatindog sang Skyway Stage 3, sang NLEX Harbor Link, sang C-5 Southlink, sang Kalayaan Bridge, sang Radial Road 10, kag madamo pa. Bangud sa inyo kon ngaa madali na maagom ang EDSA Decongestion Program – isa ka masterplan nga nagatuyo pahalugon ang 90-tuig nga circumferential highway. Bangud sa inyo kon ngaa mas malip-ot na ang tinion nga i-uyang sang mga Pilipino sa dalanon kag madamo na ang tini-on sa tagsa ka pamilya.
Ang nabilin nga lima ka tuig isa ka hublag sang bug-os nga Pilipino nga naga-asperar sang pagbag-o kag maghulag agud malab-ot ini. Mataas ang aton handum sa aton pungsod.
Madamo na nga kabanwahanan, dalanon, tren, riles, kag hulogpa-an ang napatindog sang mga OFW’s sa nagkalainlain nga bahin sang kalibutan. Ang pandemya naghatag sa aton sang pinakatalentado nga mga Pilipino agud pangalagadan ang ini nga programa. Ang Build, Build, Build naghatag sing kahigayonan sa mga OFW nga magserbisyo sa ila pungsod. Pananglit indi naton matupongan ang ila sweldo nga ginabaton sa iban nga pungsod, madamo ang nagapabilin agud masiguro nga magamit sang mga Pilipino ang imprastraktura nga sa mga laragway lamang nila makita.
Ara kita sa maayo nga dalan. Ang Pilipinas mahimo mangin isa ka trillion-dollar economy. Ginbadbad na ni Presidente Rodrigo Duterte ang mga batayan nga mangin posible ini. Ara na sa aton kon paano ini padayunon.
Ang insakto nga tawo sa misyon
Sadtong tini-on nga kami ang ara sa pamuno-an, nagsugilanon kami ni Build, Build, Build Czar Mark Villar - “Ano ang aton himuon agud mangin mas matawhay ang kahimtangan sang Pilipinas?”
Simple lang ang iya nangin sabat – mga dalanon pakadto sa pinakamabudlay nga lugar agud ang mga kabataan makatuon nga indi mangin delikado ang ila kabuhi, mga taytay nga magahugpong sa mga mangunguma kag mangingisda sa mga merkado, kag imprastraktura nga magabukas sang mga oportunidad sa mga kabaryohan kag magahatag sing kahigayonan sa mga Pilipino maghandum kag maghangad sang mas masulhay nga buas damlag.
Ano ang Build, Build, Build? Isa ini ka rebolusyon sang mga Pilipino nga nagahandum nga magbilin sang mas matahum nga Pilipinas para sa masunod nga henerasyon.