Originally published in Night Owl: A Nationbuilder's Manual (Edision nga Ilokano)

Ti Build, Build, Build ket nagbalin a puntiria dagiti fake news, troll, ken kritiko. Pinadasda a baliwan ti kayat a sawen daytoy — ket babaen ti nabileg ken kasla nakappapati a boses — impakaammoda daytoy a kas kinapudno. Diak ammo no naulawda laeng wenno talaga a panggepda ti mangdadael.

Adu ti agpanggep a mangmulit iti naiwakas ti 6.5 a million a mangmangged a Filipino. Ibagada a saan nga umdas ti naileppastayo, nga adu pay dagiti rumbeng koma nga inaramidtayo, wenno talaga a saantayo a nagtrabaho.

No basbasaem daytoy ket pasetka ti Build, Build, Build Team—no saan a gapu kenka, ditay koma nakaaramid iti 29,264 a kilometro a kalsada, 5,950 a rangtay, 11,340 nga estruktura a panglapped iti layus, 222 nga evacuation centers, 150,149 a siled- pagadalan, 214 nga eropuerto, ken 451 a pantalan. Ita, napimpintasen ti kasasaad ti Filipinas gapu iti laing, panagtrabahom, ken panagsakripisiom.

No saan a gapu iti tulongyo iti pannakaaramid ti Pigalo Bridge, dagiti mannalon iti Isabela a kayatda nga idanon dagiti apitda iti Manila wenno iti Tuguegarao, nasken pay a daliasatenda ti 76-kilometro nga Alicia-Angadanan-San Guillermo-Naguilian Road. Itan, makadanonen dagiti mannalon iti agpada a paglakuan iti uneg ti sangapulo a minuto laeng.

No saan a gapu kadagiti sakripisyo iti pannakaaramid ti Central Luzon Link Freeway, ti oras a panagbiahe manipud iti Nueva Ecija agingga iti Tarlac ket 70 a minuto pay laeng. Ita, dagiti dua a probinsya ket konektadon iti uneg laeng ti 20 a minuto,

No saan a gapu iti tured ti pakinakemyo a nangileppas iti Marawi Transcentral Road, marigatan koma pay laeng dagiti residente iti Marawi a makadanon kadagiti kangrunaan a serbisio ken makagatang kadagiti produkto. Dakayo ti nangwaya iti dalan para iti kappia.

No di gapu iti laingyo, imposible a mabangon ti Cebu-Cordova Link Bridge, ti kaatiddogan a rangtay iti Filipinas. Impakitayo kadagiti Filipino iti entero a pagilian a ti arapaap a mamagkokonektar iti Luzon, Visayas, ken Mindanao babaen dagiti rangtay ket magawgaw-attayon no agtitinnulongtayo.

No saan a gapu iti panagganetgetyo, ditay koma naileppas ti Skyway Stage 3, ti NLEX Harbor Link, ti C5 Southlink, ti Kalayaan Bridge, ti Radial Road 10, ken adu pay a sabsabali. Dakayo ti gapuna a dandanintayo malpas ti EDSA Decongestion Program — maysa a master plan nga agpanggep a mangpalawa iti 90-ti-tawennan a circumferential highway. Dakayo ti gapuna no apay a basbassiten ti oras a kaadda dagiti Filipino iti kalsada, ken ad-adun ti orasda para iti pamiliada.

Ti naudi a lima a tawen ket maysa a tignay ti sangkailian a Filipino nga agkalikagum iti panagbalbaliw ken agkuti tapno maipatungpal daytoy. Nangato ti arapaaptayo para iti pagiliantayo.

Adun dagiti siudad, kalsada, tren, riles, ken eropuerto nga inaramid dagiti OFWs iti nadumaduma a paset ti lubong. Ti pandemia ti nangted kadatayo iti kapintasan a panawen para iti panggeptayo. Ti Build, Build, Build ti nangted iti gundaway kadagiti OFW nga agserbi iti bukodda a pagilian. Nupay dimi kinabaelan a pataran ti sueldodaiti sabali a pagilian, adu ti nagtalinaed tapno sigurado a maaramat dagiti Filipino dagiti impraestruktura a makitkitada la idi kadagiti ladawan.

Addatayo iti umno a dana. Ti Filipinas ket mabalin nga agbalin a maysa a trillion- dollar economy. Imbaskagen ni Presidente Rodrigo Duterte dagiti pagbatayan tapno agbalin daytoy a posible. Adda kadatayo no kayattayo nga itultuloy.

TI UMNO A TAO ITI MISSION

Iti umuna nga aldawmi iti takem, napagsaritaanmi ken Build, Build, Build Czar Mark Villar — “Ania ti maaramidantayo tapno sumayaat pay ti kasasaad ti Filipinas?”

Simple laeng ti sungbatna—dagiti kalsada nga agturong kadagiti kasulinekan a disso tapno dagiti ubbing, makapagadalda a di agpeggad ti biagda; dagiti rangtay a mangidanon kadagiti mannalon ken mangngalap kadagiti pagtagilakuan; ken impraestruktura a manglukat iti oportunidad kadagiti away ken kadagiti Filipino nga agarapaap ken agkalikagum iti napimpintas pay a masakbayan.

Ania ti Build, Build, Build? Maysa daytoy a rebolusion dagiti Filipino nga agkalikagum a mangibati iti napimpintas pay a Filipinas para kadagiti sumarsaruno a henerasion.