top of page

Political Will iti Boracay Transformation

Anna Mae Yu Lamentillo

Sakbay ti innem a bulan a pannakaiserra ti Boracay, ti coliform bacteria iti Bolabog ket umab-abot iti 1,000,000 most probable number (MPN) per 100 milliliter (ml). Nailet dagiti kalsada ken dandani di madalanan dagiti lugan. Makiinnagaw dagiti magmagna kadagiti pedicab ken traysikel iti bassit nga espasio a matda iti kalsada. Awan bangketa. Nakastrek payen dagiti establisimiento iti igid ti baybay, adda payen paset nga awan kadaratanna.


Kalpasan ti innem a bulan, dakkelen ti nagbaliwan ti kalidad ti danum. Segun ken ni Department of Environment and Natural Resources (DENR) Secretary Roy Cimatu, ti nairekord a kaadu ti coliform bacteria ket 19-20 MPN/100 ml laengen. Nababbaba daytoy ngem iti acceptable threshold a 100 MPN/100 ml para kadagiti lugar a paglalangoyan, ken 200 MPN/100 ml kadagiti lugar a para iti noncontact sport.


Adda naikkat a 1,438 nga estruktura a naipatakder kadagiti easement area. Dagiti kalsada, a dati a nailet para kadagiti lugan, naikalawan para iti two-way traffic. Napagbalin payen dagiti bangketa a PWD-friendly. Naragragsak itan dagiti turista ta naipatungpal ti 30-metro nga easement manipud iti igid ti baybay.


Boracay Circumferential Road 1

Idi damona, kuna dagiti kritiko, ti pannakaiserra ti Boracay ket maysa a di umno nga addang, saan a naadal ti diskarte. Awan pagibatayan.


Idi bumisitaak iti Florida kas kameng ti International Visitor Leadership Program (IVLP) ti US Department of State, naammuak a ti pannakaiserra dagiti beach ket paset ti maysa nga standard operating procedure nga adda pakainaiganna iti Algal Bloom Monitoring. Iti di pay unay nabayag, naiserra met ti Jupiter Beaches iti Palm Beach County, Hobe Sound Beach, ken Bathtub Beach iti Martin County.


Iti Rhode Island, iti kanito a ti konsentrasion ti enterocci bacteria iti danum iti igid ti baybay ket labsiwanna ti 60 colony-forming units per 100 milliliter, temporario a maiserra ti beach. Iti 2018, adda di nababbaba ngem 40 beach closures iti Rhode Island, nairaman ditoy ti Briar Point Beach iti Coventry, Camp Beach iti Kingston, Bristol Town Beach, Oakland Beach iti Warwick, ken Sandy Point Beach iti Portmount. Itay laeng, ti Maya Bay iti Thailand, a pinaglatak ti pelikula ni Leonardo DiCaprio a “The Beach,” ket naiserra ket di ammo no kaano a luktanda manen.


Idi maluktan manen ti Boracay idi Oktubre 2018, dinakamat ni Department of Public Works Secretary (DPWH) Mark Villar a naluktan metten ti Phase 1 ti 4.1-kilometro a Boracay Circumferential Road ken Flood Control Project.


Ita, ti alignment, a napasubli kalpasan ti pannakaipatungpal ti 12-meter road setback rule, ket maaddaan iti doble a panggep—tapno mapalukay ti trapiko ken kas estruktura a panglapped iti layus.


Boracay Circumferential Road 2

Ti roadway plan, a pakaibilangan ti pannakaipuesto ti mapan a 1,273 a pedaso a high-density polyethylene pipes (HDPE), pannakaaramid ti loading ken unloading bays, dagiti bangketa, ken plant strips, ket narugian a nausar idi Disiembre 2018.


Ti umuna a dua benneg ti 21.64-kilometro a Boracay Circumferential Road ket nalpas idi Disiembre 2020. Pagkokonektaren daytoy dagiti kangrunaan nga entry point ti Boracay ken kissayanna ti oras ti biahe iti mapan a 70 a porsiento. Mangted met iti access iti Ati Community Village.

Anna Mae "Anime" Yu Lamentillo Logo
bottom of page